“Хүний эрхийг киногоор хүүрнэхүй” сургалт

Наадмын хүрээнд залуу кино зохиолч, продюсерүүдэд зориулсан 1 өдрийн сургалт зохион байгуулж 50 кино уран бүтээлийг хамруулна. Сургалтанд хүний ​​эрхийн асуудлыг кино бүтээлд хэрхэн тусган харуулах, түүнтэй холбоотой ямар эрсдэл учирч болох, тэдгээрийг хэрхэн даван туулах, сонирхолтой бодит жишээ, түүхийг хэрхэн сайн зохиол болгох талаар олон улсын кино наадмын шүүгч, хүний эрхийн мэргэжилтнүүд лекц орж, дадлага ажил хийж, санаа солилцоно. Цаашид хүний эрхийн асуудлаар кино хийхээр зорьж буй уран бүтээлчдэд хүний эрхийн болон мэргэжлийн харилцаа холбоогоор туслах боломжийг бүрдүүлэхэд анхаарна. Сургалтанд хүний эрхийн хуульч, Монголын кино урлагийн багш, судлаач нараас гадна Хархорум наадмын шүүгчдийн ахлагч Оскарын 2 удаагийн шагнал найруулагч Малкольм Кларк, Солонгосын алдарт найруулагч Чунг Жи Ян болон хүндэт зочид бусад нар өөрсдийн бодит туршлагад тулгуурласан сургалтуудыг орох юм. Сургалт 2023 оны 12 сарын 09-ний өдөр 08.45 цагт эхэлнэ. Бүртгэлийг www.kharkhorum-iff.com сайт дээр хийнэ. Лавлах зүйл байвал 88106865дугаарт холбогдоорой.

“Киног олон улсын наадамд бэлтгэх нь” мастер класс

Энэ жилийн "Хархорум" олон улсын кино наадмын хүрээнд кино бүтээлээ олон улсын кино наадамд оруулах хүсэлтэй продюсер найруулагчдад зориулсан мастер класс сургалтыг наадмын хүндэт зочид болох “Aзиатиска" кино наадмыг үүсгэн байгуулагч, хөтөлбөрийн захирал, хатагтай Мария Разакамболи, Пучон олон улсын кино наадмын гүйцэтгэх захирал, продюсер хатагтай Эллен Ким нар зохион байгуулна.

"Кино урлагаар дамжуулан хүний эрхийг тунхаглах нь" форум

Форум нь Монгол Улс ардчилсан нийгмийг цогцлоох явцдаа хүний эрхийн асуудалд хэрхэн хандаж буй, мөн хүн төрөлхтний амьдралд томоохон үүрэг гүйцэтгэгч мэдээллийн технологийн хөгжлийн хурд Монголын дэлгэцийн бүтээл, тэр дундаа кино урлагт хэрхэн нөлөөлж байгаад анхаарал хандуулж, кино болон дэлгэцийн аливаа бүтээл туурвих явцдаа киноны уран бүтээлчид хүний эрхийн асуудлыг зөв, эергээр тусгахад оролцогч талуудын хамтын ажиллагааг нэмэгдүүлэх зорилготой. Тиймээс дээр дурдсан салбарын төлөөлөгчийг нэгэн дор цуглуулж, иргэний байгууллагууд, иргэдтэй санал солилцоход бүх талын оролцоог хангахыг чармайж байна. Форумаас нийт кино болон контент бүтээгчдэд цаашид хийх уран бүтээлдээ хүний эрхийг зүй зохистой, зөв илэрхийлж сурахад хүчин чармайлтаа нэгтгэхийг уриалсан уриалга гаргаж түгээнэ. Ингэснээр цаашид Монголын кино урлаг, дэлгэцийн бүтээл, контентуудад хүний эрхийн ахиц дэвшил, зөрчлийг зөв харуулж чаддаг болж, олон улсын тавцанд гарах, амжилтанд хүрэхэд нь тусална. Форум дээр Засгийн газрын болон хүний эрхийн байгууллагын төлөөлөгчид болон кино наадмын хүндэт зочид илтгэл тавьж хэлэлцүүлэгт оролцоно.